NOVO DISCO: A XUSTIZA POLA MAN

A xustiza pola man é unha recompilación de 10 poemas reivindicativos e de sorprendente actualidade aínda que foron escritos hai máis de 130 anos…Textos que falan da desigualdade social, a emigración, o abandono da terra ou a frustración, cos que O Val das Mouras pretende render a súa pequena homenaxe a todas aquelas persoas que sofren as inxustizas da sociedade na que vivimos. A nivel musical, a banda mantén a formación orixinal de voz, guitarra, frauta, violonchelo e percusión, pero engaden gaitas, instrumentos de orixe galega, acordeón e teclados. Ritmos de xota, muiñeira, pop ou ska mestúranse neste novo disco que segue a conservar a esencia folk que os caracterizou dende o primeiro día.
 Entre outras plataformas atoparédelo en:

O NOSO PRIMEIRO DISCO: ROSALÍA

ROSALÍA é o noso primeiro disco, é un ano das nosas vidas. É unha viaxe, un soño, unha promesa. Once cancións que se afunden na terra coma raíces, que destilan choiva e mar, que bailan ao son das campás afastadas azoutadas polo nordés. Once pedras centenarias, once murmurios, once miradas sinceras. Once cantos de esperanza, once queixas ao vento, once certezas. ROSALÍA somos nós, ROSALÍA é e será sempre ela.

Entre outras plataformas atoparédelo en: